2025-yil 18-noyabr kuni Qo‘qon shahridagi Buyuk allomalar muzeyida O‘zbekiston tarixshunosligi rivojiga beqiyos hissa qo‘shgan sharqshunos olima Akademik Rahima Xadiyevna Aminovaning (1925–2001) 100 yilligiga bag‘ishlangan xalqaro ilmiy-ta’lim anjumani bo‘lib o‘tdi.
Tadbir “O‘zbek tarixchilari maktabi: XX asr O‘rta Osiyo agrar va ayollar masalasi tarixi” mavzusiga bag‘ishlangan bo‘lib, O‘zbekiston, Tojikiston va Qirg‘izistonning yetakchi tarixchi olimlari ishtirok etdilar.
Tadbir Oʻzbekiston Tarixchilari jamiyati, Qoʻqon davlat universiteti, Qoʻqon shahar hokimligi, Oʻzbekiston Respublikasi Fanlar akademiyasi Tarix instituti hamkorligida tashkil etildi.
Tadbirda Oʻzbekiston, Tojikiston va Qirgʻizistondan yetakchi olimlarning asosiy maʼruzalari tinglandi, jumladan, Ahmadali Asqarov, Dilorom Olimova, Hasanov Baxtiyor Vahapovich, Abdulla Nuritdinovich Rasulov va boshqalar R. Aminovaning tadqiqotlari bilan bogʻliq dolzarb masalalarni qamrab olgan quyidagi mavzularda so’zga chiqdilar:
* «Oʻzbekiston tarixi sovet davrining zamonaviy baholari: anʼanaviylik darajasi va yangi tendensiyalar».
* «Rahima Aminova va Qoraqalpogʻistonda ayollar hamda qishloq xoʻjaligi tarixi».
* «R.Aminova va gender muammolarini oʻrganish tajribasi».
Tadbirning yakuniy qismida akademik Rahima Aminova nomini abadiylashtirishga bagʻishlangan yodgorlik majmuasining tantanali ochilishi bo’lib o’tdi.
2025-yil 20-noyabr kuni Mirzo Ulug‘bek nomidagi O‘zbekiston Milliy universiteti hamda O‘zbekiston Respublikasi Fanlar akademiyasining Davlat va huquq instituti hamkorligida, O‘zbekiston Tarixchilar jamiyati ko‘magida akademik Rahima Hodiyevna Aminovaning (1925–2001) tavalludining 100 yilligiga bag‘ishlangan ilmiy-ta’limiy konferensiya tashkil etildi.
Tadbir O‘zbekiston tarixshunosligida sovet davri ijtimoiy-siyosiy jarayonlari, agrar islohotlar, gender masalalari va madaniyat tarixini zamonaviy metodik yondashuvlar asosida tadqiq etishga qaratilgan.
Konferensiya dasturi davomida sovet davri tarixshunosligi doirasida yangi ilmiy qarashlar muhokama qilinib, Markaziy Osiyoda modernizatsiya jarayonlari, xotin-qizlar harakatining shakllanishi, milliy davlatchilik siyosatining evolyutsiyasi va tarixiy manbashunoslikdagi yangi trendlar atroflicha ko‘rib chiqildi.
