2025-yil 25-noyabr kuni Konrad Adenauer nomidagi Fondning Yevropa va xalqaro hamkorlik bosh boshqarmasi Osiyo va Tinch okeani mintaqasi mamlakatlari bo‘yicha departamenti rahbari Kristiana Exle, shuningdek, Konrad Adenauer nomidagi Fondning Markaziy Osiyodagi vakolatxonasi rahbari Andre Algermissen hamda Konrad Adenauer nomidagi Fondning Markaziy Osiyo bo‘yicha loyihalar koordinatori Ashraf Aliqulov O‘zbekiston Respublikasi Vazirlar Mahkamasi huzuridagi Qatag‘on qurbonlari xotirasi davlat muzeyiga tashrif buyurdilar.
Mehmonlarni muzey direktori, tarix fanlari doktori, professor Xasanov Baxtiyor Vahapovich muzey ma’muriy binosida samimiy kutib oldi. Uchrashuv davomida tomonlar muzey faoliyatining yo‘nalishlari, erishilgan yutuqlar, xotira siyosati doirasida amalga oshirilayotgan ma’naviy-ma’rifiy tadbirlar hamda kelgusidagi ustuvor vazifalar haqida atroflicha fikr almashdilar.
Uchrashuvning bosh maqsadi – xalqaro tajriba almashish, muzey sohasi rivojida ilg‘or texnologiyalarni tatbiq etish, ilmiy-tadqiqot faoliyatini kengaytirish hamda muzey mutaxassislarining kasbiy malakasini oshirish imkoniyatlarini muhokama qilishdan iborat bo‘ldi.
Shuningdek, muzokaralarda ikki tomonlama hamkorlikni yanada rivojlantirish, qo‘shma ilmiy-amaliy loyihalar, ko‘rgazmalar, tajriba almashuv dasturlarini amalga oshirish masalalari ko‘rib chiqildi.
Tashrif yakunida xorijiy mehmonlar muzey ekspozitsiyasi bilan yaqindan tanishtirildi. Ular O‘zbekistonda qatag‘on qurbonlari xotirasini abadiylashtirish yo‘lida olib borilayotgan keng ko‘lamli ishlarga yuksak baho berib, ushbu yo‘nalishda kelgusida samarali hamkorlik qilishga tayyor ekanliklarini bildirdilar.
