A+ A-

RESPUBLIKA ILMIY-AMALIY ANJUMANI

10-oktyabr kuni O’zR VM Qatag’on qurbonlari xotirasi davlat muzeyi va “Shahidlar xotirasi” jamoat fondi tomonidan O’zbekiston Respublikasi Vazirlar Mahkamasining 2019-yil 25-fevraldagi 133-f-sonli farmoyishi asosida “XX asr birinchi choragida Turkiston milliy matbuot sahifalarida islohotchilik g’oyalarining yoritilishi” mavzuidagi Respublika ilmiy-amaliy anjumani o’tkazildi.

Ma’lumki, Turkistonda dastlabki taraqqiyparvar milliy gazetalar 1905-1907-yillarda faoliyat ko’rsata boshladi (“Taraqqiy”, “Xurshid”, “Shuhrat” va boshqalar). Ularning yo’lini XX asrning birinchi choragida chop etilgan “Sadoi Turkiston”, “Sadoi Farg’ona”, “El bayrog’i”, “Najot”, “Turon”, “Oyina”, “Samarqand”, “Hurriyat”, “Turk so’zi”, “Ulug’ Turkiston” kabi bir qator gazeta va jurnallar davom ettirdi. Milliy nashrlar o’zbek xalqining mustamlakachilik kishanlaridan xalos bo’lishi yo’lida qizg’in faoliyat olib borib, og’ir ijtimoiy, iqtisodiy va madaniy sharoitda yashayotgan xalqni erk va hurriyat, milliy birlik va taraqqiyot g’oyalari ruhida tarbiyalashga katta e’tibor berdi. Shu davrda Cho’lpon, Avloniy, Qodiriy, Tavallo, Miskin singari shoirlar, U.Xo’jaev, S.Mirjalilov, T.Norbo’tabekov singari jamoat arboblari milliy qoloqlik va jaholatga qarshi xalq va jamiyat hayotiga ma’rifatparvarlik g’oyalarini olib kirishga, xalqni erk, hurriyat va milliy taraqqiyot bayrog’i ostida birlashtirishga qaratilgan she’r va publisistik maqolalarni e’lon qildilar.

Respublika ilmiy-amaliy anjumani mazkur gazeta va jurnallarning shu sohadagi faoliyatlarini o’rganishga bag’ishlandi.

Unda quyidagi muammolarni muhokama qilindi:

– O’zbek xalqining milliy uyg’onishi, ijtimoiy zulm iskanjasidan qutulishi, erk va hurriyat, milliy birlik va taraqqiyot bayrog’i ostida birlashuvida XX asrning birinchi choragidagi matbuotning o’rni va roli;

– Milliy matbuot nashrlarining maktab, maorif, milliy tarix, istiqbol muammolarini yoritishdagi ahamiyati;

– Ilk milliy nashrlarning o’zbek matbuoti va adabiyotiga ta’siri.

Anjumanda muhokama etilgan muammolar, birinchidan, Vatanimiz tarixiga oid muhim ma’lumotlarni ilmiy muomalaga kiritishga, ularning hozirgi kundagi ahamiyatini, barkamol avlodni tarbiyalashdagi o’rnini belgilab berishga xizmat qiladi. Ikkinchidan, XX asr boshi matbuotidagi ijtimoiy-siyosiy, madaniy-ma’rifiy, ilmiy-adabiy mavzularni tadqiq qilish tegishli davr tarixi, ijtimoiy, siyosiy muammolarini mustaqillik g’oyasi nuqtai nazaridan ilmiy va xolis baholash hamda ilmiy to’g’ri xulosa chiqarish imkonini beradi.

Anjumanda Qoraqalpoqiston Respublikasi, Namangan, Farg’ona, Samarqand va boshqa viloyatlardan kelgan tarixchi, adabiyotshunos olimlarning ma’ruzalari tinglandi.

Unda O’zbekiston jurnalistika va ommaviy kommunikatsiya universiteti, O’zbekiston xalqaro islom akademiyasi, O’zbekiston milliy universiteti, Toshkent davlat sharqshunoslik instituti, , Toshkent davlat moliya institutining professor-o’qituvchilari, yosh tadqiqotchilari hamda talaba yoshlari ishtirok etdilar.

Anjuman o’z ishini “Shahidlar xotirasi” yodgorlik majmuidagi Ramziy sag’ana oldida shahidlar xotirasini yod etish marosimi bilan boshladi.