A+ A-

XABARNOMA

“Mahmudxo’ja Behbudiy va uning Turkistondagi milliy uyg’onish davri maorifi, adabiyoti va san’atining shakllanishi va rivojlanishidagi roli” mavzuidagi Respublika ilmiy-amaliy anjumani to’g’risida

XABARNOMA

O’zbekiston Respublikasi Vazirlar Mahkamasi huzuridagi Qatag’on qurbonlari xotirasi davlat muzeyi Sizni 2019 yil 24 mayda o’tkaziladigan Respublika ilmiy-amaliy anjumanida ilmiy ma’ruza va axborotlar bilan ishtirok etishga taklif qiladi.

Anjumanning o’tkazilishiga asos bo’lgan me’yoriy hujjatlar: O’zbekiston Respublikasi Vazirlar Mahkamasining 2019 yil 25 fevraldagi 133-f-sonli farmoyishi.

Anjuman tashkilotchilari: O’zbekiston Respublikasi Vazirlar Mahkamasi huzuridagi Qatag’on qurbonlari xotirasi davlat muzeyi, “Shahidlar xotirasi” jamoat fondi.

Anjumandan maqsad: Turkistondagi milliy uyg’onish harakatining asoschisi Mahmudxo’ja Behbudiy (1874-1919 yy.) tavalludining 145 yilligi munosabati bilan tashkil etilayotgan anjumanning asosiy maqsadi M.Behbudiyning XX asr boshlarida Turkistonda junbushga kelgan milliy uyg’onish harakati va shu harakatning tarmoqlari – milliy ta’lim tizimini isloh qilish, milliy jurnalistikani rivojlantirish, yangi o’zbek adabiyoti va milliy o’zbek teatrining shakllanishidagi roli va ahamiyatini asoslashdan iborat. Sho’rolar hokimiyati siyosati tufayli qatag’onga uchragan Mahmudxo’ja Behbudiy merosining mustaqillik yillarida o’rganilishi, targ’ib qilinishi, uning merosini xalq va fanga qaytarilishi adib asarlarining hozirgi kundagi ahamiyati, barkamol avlodni tarbiyalashdagi o’rnini belgilash imkonini beradi.

Anjumanning ilmiy yo’nalishi: O’zbekistonning mustamlakachilik davri tarixi va tarixshunosligi, jurnalistika, jamiyatshunoslik, siyosatshunoslik, adabiyotshunoslik, pedagogika.

Muhokama qilinadigan muammolar:

a) XIX asr oxiri – XX asr boshlarida Turkistondagi ijtimoiy, iqtisodiy va madaniy sharoit hamda ta’lim tizimini isloh qilish g’oyasining tug’ilishi. Bu g’oyaning tug’ilishiga sabab bo’lgan manbalar;

b) XVIII asrdagi fransuz ma’rifatparvarlik harakatining Turkistondagi ma’rifatparvarlik harakatiga ta’siri;

v) yangi usul maktablari uchun o’quv qo’llanmalariga jahon yozuvchilari asarlarini jalb etishning ahamiyati;

g) jadidlarning jurnalistikadan milliy taraqqiyot g’oyalarini targ’ib etishda muhim minbar sifatida foydalanishi;

d) yangi o’zbek adabiyotining maydonga kelishi. Behbudiy, Fitrat, Cho’lpon, Qodiriy, Tavallo va boshqa shoirlar ijodida vatanparvarlik, erk va hurriyat g’oyalarining kuylanishi;

ye) jadid teatrining milliy jaholatga qarshi, milliy taraqqiyot uchun kurashdagi ahamiyati;

j) M.Behbudiy, M.Abdurashidxonov, A.Avloniy, Xamzaning jadidchilik harakati va adabiyotining shakllanishidagi roli;

z) chor oxrankasining jadid maktablari, nashrlari va teatriga hamda ularning tashkilotchilariga qarshi faoliyati;

i) Turkistondagi milliy uyg’onish harakati tarixi va namoyandalari faoliyatini o’rganishning hozirgi kundagi ijtimoiy, madaniiy va tarbiyaviy ahamiyati.

Anjumanning ishchi tillari: o’zbek va rus tillari

Anjumanda ishtirok etish uchun talabnoma va maqolalar matni 2019 yil 24 aprelgacha qabul qilinadi.

Anjumanga taqdim etiladigan ma’ruzalarga qo’yiladigan talablar:

- ma’ruzalar yuqorida bayon qilingan masalalar doirasida;

- shu vaqtgacha mutaxassislar tomonidan ishlanmagan yoki yetarli darajada ishlanmagan muhim masalalarga bag’ishlangan, shuningdek,

- turli manbalardan oshkora ko’chirib olinmagan bo’lishi;

- universitet, institut yoki kafedra rahbarlarining yozma tavsiyalari bilan birga yuborilishi lozim.

Anjuman materiallari quyidagi tartibda rasmiylashtiriladi:

– maqola matni anjuman mavzusiga mos bo’lib, muammo dolzarb, ilmiy-amaliy ahamiyatga ega va yangi faktik materiallar asosida yoritilgan bo’lishi lozim;

– hajmi A4 formatda, 14 o’lchamli shriftda, 6 betgacha, Times New Roman (o’zbek yoki rus tillarida), qatorlar orasi 1,5 intervalda, yuqori va pastdan 2 sm, chapdan 3 sm va o’ngdan 1,5 sm oraliqda xoshiya tashlangan holda tayyorlanadi;

– maqola sarlavhasi yuqoridan 2 interval tashlab yoziladi, muallif familiyasi va ism-sharifi, ilmiy darajasi va lavozimi sarlavha ostida (o’rtada), uning ostida muassasa nomi ko’rsatiladi;

– foydalanilgan manbalar ro’yxati maqola oxirida tartib raqami bilan beriladi, manbalarga havolalar (snoska) matn ichida kvadrat qavsda [1; 28] shaklda berilishi talab etiladi;

– maqola matni tahrir qilingan holda 1 nusxada, elektron shakli CD diskda Tashkiliy qo’mitaga ko’rsatilgan muddatgacha topshiriladi. Materiallar elektron shaklda quyida ko’rsatilgan E-mail manzili bo’yicha ham qabul qilinadi;

– Tashkiliy qo’mita tomonidan tanlab olingan ilmiy maqolalar to’plam shaklida nashr etilishi rejalashtirilmoqda.

Matnlarda uslubiy yoki imloviy xato va tuzatishlar mavjud bo’lsa, noto’g’ri rasmiylashtirilsa talabga javob bermaydigan ish sifatida qabul qilinmaydi.

Tashkiliy masalalar bo’yicha qo’shimcha ma’lumotlar olish uchun quyidagi manzilga murojaat qilish mumkin:

Toshkent shahri, Navoiy ko’chasi, 69-uy, Qatag’on qurbonlari xotirasi davlat muzeyi ma’muriyati.

Telefonlar: + (998-71) 244-29-40; +(998-71) 241-85-56 (M.Zikrullaev)

Faks: + (998-71) 244-29-40; +(998-71) 241-85-56

E- mail: info@muzey-xotira.uz

Web site: www.muzey-xotira.uz